Həyatımızın böyük bir hissəsi peşə fəaliyyətinə həsr olunduğundan, görülən işin insanı mənəvi cəhətdən qane etməsi onun ümumi həyat keyfiyyətinə birbaşa təsir göstərir. Öz işində xoşbəxtlik tapan insan yalnız maddi təminat əldə etmir, eyni zamanda özünü faydalı, dəyərli və cəmiyyətin ayrılmaz üzvü kimi hiss edir. Buna görə də insanların peşə fəaliyyətində xoşbəxt olmaları təsadüfi deyil, müəyyən şərtlərin və düzgün seçimlərin nəticəsidir.

Psixoloq Aytən Ələkbərova “İki sahil”ə açıqlamasında bildirdi ki, insanların öz işində xoşbəxtlik tapması üçün üç əsas şərt vacibdir.

Birincisi, işin mənalı və maraqlı olmasıdır. İnsan yalnız sevdiyi və maraq göstərdiyi sahədə çalışdıqda özünü motivasiyalı və mənəvi baxımdan dolğun hiss edir. Maraqlı iş günün yorğunluğunu azaltmaqla yanaşı, yaradıcılıq qabiliyyətini də inkişaf etdirir. İkincisi, iş mühitinin insanın inkişafına və əhval-ruhiyyəsinə uyğunluğudur. Dəstəkləyici rəhbərlik, əməkdaşlar arasında qarşılıqlı hörmət və sağlam kommunikasiya iş məmnuniyyətini artıran əsas amillərdəndir. Pozitiv iş mühiti insanın stress səviyyəsini azaldır və peşə fəaliyyətinə olan həvəsini gücləndirir. Üçüncüsü, əmək haqqı və sosial təminatın adekvat olmasıdır. Maddi təminat yalnız iqtisadi ehtiyacları ödəmək üçün deyil, eyni zamanda, insanın özünü dəyərli və təhlükəsiz hiss etməsi üçün də vacibdir. Adekvat əmək haqqı və sosial təminat işin motivasiyaedici tərəfini gücləndirir.

Beləliklə, insanların iş həyatında xoşbəxt olması üçün üç əsas şərt mövcuddur: işin mənalı olması, sağlam və dəstəkləyici mühit, həmçinin adekvat maddi təminat. Bu amillərin vəhdəti insanın peşə fəaliyyətindən zövq almasını və ümumi həyat məmnunluğunu təmin edir. Yalnız belə bir mühitdə fərdlər həm işindən zövq ala, həm də şəxsi və peşəkar inkişaflarını uğurla davam etdirə bilərlər. İnsan sevdiyi və maraq göstərdiyi sahədə çalışdıqda mənəvi baxımdan dolğunlaşır, işinə daha məsuliyyətlə yanaşır. İşin mənalı olması isə həm məhsuldarlığı artırır, həm də müəssisəyə olan sadiqliyi möhkəmləndirir. Uğurların qiymətləndirilməsi də motivasiyanı gücləndirən vacib amillərdəndir. Nəhayət, işçinin öz işini təşkil edə bilməsi, qərarlar verməsi və məsuliyyət daşıması, eləcə də sağlam və stresssiz iş mühiti onun işə marağını və motivasiyasını daha da artırır. A.Ələkbərova əlavə etdi ki, ədalətli və şəffaf idarəetmə, qərarların açıq şəkildə qəbul edilməsi və işçilərin rəylərinin nəzərə alınması sağlam iş mühitinin vacib xüsusiyyətlərindəndir. Beləliklə, sağlam iş mühiti təkcə fiziki təhlükəsizlik deyil, həm də psixoloji rahatlıq, qarşılıqlı dəstək, inkişaf imkanları və ədalətli idarəetmə prinsiplərinin vəhdəti deməkdir. Qeyd etmək lazımdır ki, insanların işdəki məmnuniyyəti yalnız onların şəxsi səylərindən deyil, həm də mövcud iş mühitindən birbaşa asılıdır. Bu səbəbdən hər bir təşkilat işçilərin rifahını və motivasiyasını əsas götürərək, sağlam korporativ mühitin formalaşdırılmasına önəm verməlidir.

Şəmsiyyə Əliqızı, “İki sahil”