Fransada bələdiyyə seçkilərindən sonra prezident seçkiləri ilə bağlı gərginlik daha da artıb.

“İki sahil” xəbər verir ki, Fransada sağ və mərkəzçi düşərgəyə mənsub təxminən 90 siyasi şəxs 2027-ci il prezident seçkiləri üçün vahid namizədin irəli sürülməsi çağırışı ilə çıxış edib. Nazirlər və parlament üzvlərinin də imzaladığı bu müraciət “La Tribune Dimanche” nəşrində dərc olunub.

Müraciətdə bildirilir ki, hazırkı siyasi konfiqurasiya prezident seçkilərinin ikinci turunda Jordan Bardella ilə Jan-Lük Melanşon arasında qarşıdurma ehtimalını artırır. İmza atanlar bu ssenarini populizmə doğru birbaşa yol kimi qiymətləndirərək, bunun qarşısını almaq üçün birləşmənin vacibliyini vurğulayırlar.

“Bu cür inkişafın qarşısını almaq üçün biz – mərkəzi blokun və sağ düşərgənin seçilmiş nümayəndələri – bu gün sözümüzü deyirik”, – deyə müraciətdə qeyd olunur. Onlar əlavə edirlər: “Biz birlik üçün səfərbərliyə çağırırıq ki, 2027-ci ildə vahid proqram və vahid namizəd ətrafında geniş birləşmə yaradılsın.”

Siyasətçilər öz partiyalarının rəhbərlərini, artıq elan olunan və gələcəkdə namizəd ola biləcək şəxsləri dialoqa dəvət edir və onları şəxsi ambisiyaları kənara qoymağa çağırırlar.

Bununla belə, təşəbbüs müəllifləri bu birliyin hansı mexanizm vasitəsilə formalaşdırılacağına dair konkret mövqe ortaya qoymayıblar. Bəzi siyasətçilər ilkin seçkiləri mümkün variant kimi irəli sürsələr də, imza atanlar bu məsələdə açıq mövqe bildirməyiblər.

“Metodlar önəmli deyil, yolların fərqi yoxdur”, – deyə onlar vurğulayaraq bildiriblər ki, hazırkı şəraitdə birlik yaratmaq bir vəzifədir.