Prezident İlham Əliyevin sədrliyi ilə keçirilən kənd təsərrüfatı məsələlərinə həsr olunmuş müşavirədə Azərbaycanın aqrar siyasətində yeni mərhələnin konturları müəyyənləşdirildi. Prezident İlham Əliyev çıxışında qeyd etdi ki, son 20 ildə regionların sosial-iqtisadi inkişafı proqramları kənd təsərrüfatının dirçəlməsində həlledici rol oynayıb. Ölkədə qazlaşdırmanın 96 faizə çatdırılması, yol və su infrastrukturlarının yenilənməsi, yeni su anbarlarının tikilməsi kənd təsərrüfatının inkişafı üçün mühüm baza yaradıb. Taxtakörpü, Şəmkirçay, Göytəpə kimi su anbarlarının istifadəyə verilməsi, yeni magistral kanalların inşası əkin sahələrinin su təminatını xeyli yaxşılaşdırıb.
Bununla belə, dövlət başçısı son illərdə aqrar sahədə müşahidə olunan durğunluğun narahatlıq doğurduğunu bildirdi. Bu səbəbdən 2026–2030-cu illəri əhatə edəcək yeni Dövlət Proqramının hazırlanması qərara alınıb. Proqramın əsas məqsədi məhsuldarlığın artırılması, idxaldan asılılığın azaldılması və ixrac potensialının gücləndirilməsidir.
Beləliklə, yeni Dövlət Proqramı kənd təsərrüfatının transformasiyasını müxtəlif istiqamətlər üzrə həyata keçirəcək. İlk növbədə resurs səmərəliliyinə əsaslanan kənd təsərrüfatı, dəyər zəncirinin və bazar inteqrasiyasının gücləndirilməsi, eləcə də texnologiya və innovasiyaların tətbiqini əhatə edəcək.
Əsas prioritetlərdən biri intensiv əkinçiliyə keçidin sürətləndirilməsidir. Hazırda müasir suvarma sistemləri tətbiq olunan sahələr 130 min hektardır. Məqsəd bu göstəricini 300 min hektara çatdırmaqdır.
Müşavirədə xüsusi vurğulanan məsələlərdən biri aqrar emal sənayesinin inkişafı oldu. Təhlillər göstərir ki, Azərbaycan daha çox xammal ixrac edir, hazır məhsul idxal edir. Buna görə də yeni mərhələdə emal müəssisələrinin yaradılması prioritet istiqamətlərdən biri olacaq.
Prezident İlham Əliyev pambıqçılıqda mahlıc ixracından hazır tekstil məhsulları istehsalına keçidin vacibliyini qeyd etdi və investorları yeni fabriklər yaratmağa çağırdı. Eyni yanaşmanın digər sahələrdə də tətbiqi nəzərdə tutulur. Müşavirədə su ehtiyatlarının idarə olunması məsələsinə də xüsusi diqqət yetirildi. İqlim dəyişiklikləri fonunda su resurslarından daha səmərəli istifadə həyati əhəmiyyət daşıyır. Şirvan və Qarabağ kanallarının yenidən qurulması, yeni su anbarlarının tikilməsi və müasir damcı suvarma sistemlərinin tətbiqi məhsuldarlığın artırılması ilə yanaşı, su itkilərinin azaldılmasına xidmət edəcək. Qarabağ və Şərqi Zəngəzurda həyata keçirilən su layihələri də aqrar inkişaf strategiyasının mühüm hissəsidir. Yeni su infrastrukturu sayəsində yüz minlərlə hektar torpağın dövriyyəyə qaytarılması nəzərdə tutulur.
Prezident İlham Əliyevin müşavirədə səsləndirdiyi mühüm məqamlardan biri də Azərbaycanın artıq beynəlxalq miqyasda “orta gücə malik dövlət” kimi tanınması barədə fikirləri oldu. Dövlət başçısı vurğuladı ki, Azərbaycanın artan beynəlxalq nüfuzu xarici investorların ölkəyə marağını gücləndirir.
Yeni mərhələdə kənd təsərrüfatının inkişafı xarici investisiya və beynəlxalq tərəfdaşlıqlar vasitəsilə də sürətləndiriləcək. Cənab Prezidentin mesajı ondan ibarət idi ki, Azərbaycan artıq regional iqtisadi proseslərdə fəal rol oynayan, sabit və etibarlı tərəfdaş kimi qəbul edilir. Bu isə aqrar sektora texnologiya transferi, müasir idarəetmə təcrübələrinin gətirilməsi və yeni ixrac bazarlarının açılması üçün əlavə imkanlar yaradır.
Könül Nurullayeva,
Milli Məclisin deputatı
