NATO-nun Baş katibi Mark Rütte yaxın gələcəkdə bir sıra ABŞ silah və hərbi texnika nümunələrinin istehsalının birbaşa Avropa məkanında işə salınacağını bəyan edib.

“İki sahil” xəbər verir ki, bu barədə RİA Novosti məlumat yayıb.

Baş katib qeyd edib ki, Vaşinqton bu məqsədlə Avropanın ən böyük hərbi-sənaye korporasiyaları ilə rəsmi razılıq əldə edib: "Amerika Birləşmiş Ştatları Avropanın müdafiə sənayesi sektorunun ən nəhəng oyunçuları ilə müqavilələr imzalayıb. Bu mühüm addım bizə ABŞ-ın əsas strateji silahlarını — o cümlədən 'Abrams' tanklarını, 'AMRAAM', 'ATACMS', 'Barracuda 500M' raketlərini, 'Small Diameter Bomb' aviasiya bombalarını və 'Stinger' zenit-raket komplekslərini elə burada, Avropada istehsal etməyə və onlara texniki xidmət göstərməyə imkan verəcək".

Avropadakı bu yeni və genişmiqyaslı hərbi layihələrin icrasında ABŞ-ın dünyaca məşhur silah istehsalçıları tərəfdaş qismində iştirak edəcəklər. Həmin şirkətlər sırasına aşağıdakı holdinqlər daxildir: "Boeing",  "Lockheed Martin", "Raytheon",  "General Dynamics Land Systems" və "Anduril".