"Roost Social" tətbiqi anlıq bildirişlərin təzyiqindən yorulanlar üçün mesajı virtual quşların köməyi ilə real məsafə sürətinə uyğun olaraq saatlar və ya günlər ərzində çatdırır

Dünyada sürətli və anlıq mesajlaşma dövrünə alternativ olaraq tamamilə fərqli konsepsiyaya malik "Roost Social" adlı yeni messencer fəaliyyətə başlayıb. Tətbiqin əsas ideyası mesajları dərhal deyil, məhz poçt göyərçininin uçuş sürəti ilə çatdırmaqdır. Virtual quş xəritə üzərindən göndərəndən alıcıya doğru "uçur", buna görə də çatdırılma vaxtı birbaşa real coğrafi məsafədən asılıdır. Nəticədə iki şəxs arasında yazışma bir neçə saat, yaxud bir neçə gün çəkə bilər.

“İki sahil” xəbər verir ki,  bu barədə "Kommersant" məlumat yayıb.

"Roost" layihəsi "Ticketmaster" şirkətinin etimad və təhlükəsizlik üzrə meneceri Loqan Mendelson tərəfindən kiçik bir fərdi startap kimi qurulub. Lakin proqram gözlənilmədən internetdə virus kimi sürətlə yayılıb: cəmi bir neçə həftə ərzində messencerin auditoriyası 10 nəfərdən 300 min istifadəçiyə yüksəlib.

Tətbiqin bu qədər populyarlaşmasına "Threads" platformasında paylaşılan bir post ciddi təkan verib. Həmin paylaşımda bir ana qeyd edib ki, onun yeniyetmə qızı rəfiqələri ilə bu proqramda məhz Yelizaveta dövrünün klassik ingilis dilində (Elizabethan English) yazışır. Çünki mesajların gec çatması gəncləri daha çox düşünməyə sövq edir və ünsiyyəti daha mənalı, dəyərli formaya salır.

İstifadəçilər tətbiqdə mesajı hansı canlının köməyi ilə göndərəcəklərini özləri seçə bilərlər: Daha çevik quş növləri mesajı nisbətən tez çatdırır;

Ünsiyyəti maksimum dərəcədə yavaşlatmaq istəyənlər üçün isə tısbağa və ya ilbiz funksiyaları da əlçatandır.

Layihə müəllifləri "Roost" proqramını "slow-cial" (yavaş sosial şəbəkə) adlandırırlar. Bu, müasir insanın üzərində hər saniyə anlıq cavab gözləntisi yaradan və daimi bildirişlərlə psixoloji təzyiq göstərən klassik messencerlərə qarşı ən effektiv rəqəmsal detoks alternatividir.