28 yanvar 2019 10:56
897

Smartfonlarda “10 GB RAM” dövrü başlayır

Bildiyimiz kimi, yaddaşın 2 növü var: əməli və daimi. Əməli,  bəzən də təsadüfi  yaddaş (RAM), yəni Random Access Memory,  daimi yaddaş isə (ROM), yəni Read Only Memory adlanır. Onlar MB və GB  vahidləri ilə ölçülür. Hər iki yaddaş  növü müasir texnoloji vasitələrin  mühüm tərkib hissəsi, fəaliyyəti üçün lazım olan ən vacib detallardır. Yaddaşın kifayət qədər olması bizə lazım olan materialları telefon və kompyuterimizdə yerləşdirməyə imkan verir.

İstifadəçilərin müasir smartfonlarda  önəm verdiyi ən əsas keyfiyyətlərdən biri də yaddaş tutumudur. Texnoloji  vasitələrdə həm əməli, həm də daimi yaddaş olur. Daimi yaddaşın tutumu yüksək olsa da,  əməli yaddaş ən çox  6GB həcmində olur.  Adətən istehsal olunan “ağıllı telefonlar”da  əməli yaddaş 4GB həcmində satışa buraxılır. Əgər 6GB tutumu var idisə, o zaman həmin telefon mükəmməl  hesab olunurdu. Doğrudur, qiymət baxımından fərqlənir. Yəni tutumu yüksək olan smartfonlar daha baha qiymətə satılır. Keyfiyyətə üstünlük verən alıcılar üçün isə bu  heç bir əhəmiyyət kəsb etmir.  İstər əməli, istərsə də daimi yaddaşın  həcminin çox olması qiyməti yüksək edən  əsas amillərdən biridir.

“Samsung”  şirkəti yeni  təqdim edəcəyi “Samsung S10”  model smartfonlarda əməli yaddaş tutumunu 10GB həcmində təqdim edəcək. Şirkət bu modeli fevral ayında istifadəyə verməyi düşünür. Daim rəqabət mühitində fəaliyyət göstərən “Samsung” və “Apple” şirkətləri bu mövzuda da ənənəyə sadiq qaldılar.  Sentyabrda isə “Apple” şirkəti tərəfindən təqdim olunacaq bu yenilik  həm Android, həm də İOS sistemi istifadəçiləri üçün əla fürsət olacaq.

Telefonun fəaliyyətinə təsir edən amillər sırasında  yaddaş  çox önəmli yer tutur. Çünki smartfonların işləməsinə mane  olan səbəblərdən biri də yaddaş tutumunun  tam dolmasıdır. Bu zaman “ağıllı telefonlar”da tez-tez xəbərdarlıq gəlir: “yaddaşınız dolmaq üzrədir”. Əsas və vacib material olduğundan onları silə bilmirik. Bu da telefonumuzun donmasına, ləng işləməsinə  səbəb olur. Bəzən batareyanın enerjisinin tez bitməsinə, yüklənib şişməsinə səbəb olur. Ona görə də  davamlı olaraq,  yaddaşın tutumuna nəzarət edin. Lazımsız, təkrar, yüksək həcmli materiallardan təmizləyin. Xüsusi yaddaş təmizləyən proqramlar vardır.  Məsələn, əməli yaddaşı təmizləmək üçün “Clean Master”, daxili yaddaşı təmizləmək üçün  “CCleaner”, “Clear Cache” proqramları var.

Telefonunuzdan, tabletlərdən, kompyuterlərdən  lazımsız məlumatları silmək sizin texnoloji alətinizin məhsuldarlığını artıracaq, bu isə  onlardan rahat istifadə etmək üçün zəmin yaradacaq. Ona görə də texnoloji alətlərin yaddaş tutumunu daim nəzarətinizdə saxlayın. Materialları qruplaşdırın. İkinci dərəcəli, əlavə məzmunlu, yardımçı xarakter daşıyan bilgilər üçün köməkçi yaddaş vasitələrindən( fləş kart, müxtəlif həcmli yaddaş kartları, SD disklərdən) istifadə edin. Beləliklə də sizə lazım olan vasitələri asanlıqla qoruyub saxlaya bilərcəksiniz.

Yaqut Ağaşahqızı, “İki sahil”