Salvador ABŞ-da saxlanılan qeyri-qanuni mühacirləri öz həbsxanalarında yerləşdirməyə razılıq verib. Bundan əlavə, prezident Nayib Bukele də mühakimə olunan cinayətkarları əlavə ödəniş müqabilində ABŞ-da nəzarətə götürəcəyini vəd edib. Onların “meqa həbsxana” kimi tanınan Terrorçuların Saxlanma Mərkəzinə göndəriləcəyi gözlənilir.

Salvador dövlət başçısı Nayib Bukele və ABŞ dövlət katibi Marko Rubio fevralın 3-də keçirilən görüşdə qeyri-qanuni miqrasiya ilə mübarizə üzrə razılığa gəliblər. Dövlət Departamentinin saytında yayılan press-relizdə aydınlıq gətirilib ki, Salvador ABŞ-da qeyri-qanuni miqrant olan MS-13 dəstəsinin vüzvlərini qəbul etmək qərarına gəlib.

“Biz onları göndərəcəyik və Salvador onları həbsxanalarına salacaq. Nayib Bukele ABŞ vətəndaşları və ya qanuni rezidentləri olsalar belə, hazırda ABŞ-da cəza çəkən cinayətkarlarla da eyni şeyi etməyi təklif edib” - deyə, Rubio bildirib.

Görüşün nəticələrini şərh edən Bukele bildirib ki, El Salvador Birləşmiş Ştatlara “həbsxana sisteminin bir hissəsinin kənardan alınmasını” təklif edib. O, El Salvadorun yalnız "məhkum edilmiş cinayətkarları" qəbul edəcəyini və Birləşmiş Ştatlar üçün "nisbətən aşağı" rüsum alacağını, eyni zamanda ölkənin həbsxana sistemini daha dayanıqlı edəcəyini qeyd edib.

Donald Tramp qeyri-qanuni mühacirlərlə mübarizə aparmaq niyyətini hələ ABŞ prezidenti vəzifəsinə başlamazdan əvvəl açıqlamışdı. İnauqurasiyadan dərhal sonra kolumbiyalı miqrantların genişmiqyaslı çıxarılmasına başlanılıb. Boqota onları qəbul etməkdən imtina etdi, lakin Trampın mallara 25% rüsum tətbiq etməklə hədələməsindən sonra fikrini dəyişdi.