Hipertoniya dünyada ən çox yayılmış xəstəliklərdən biridir. Hipertoniya zamanı qan təzyiqi durmadan yüksəlir və bu, vaxtında nəzarət altına alınmazsa, ürək, beyin, böyrəklər və gözlərdə ciddi problemlərə səbəb ola bilər. Rusiyalı televiziya həkimi Aleksandr Myasnikov bu barədə müəllif proqramında ətraflı danışıb.

Onun qənaətinə görə, əgər təzyiq vaxtaşırı yüksəlirsə bunun səbəbi hipertoniya ola bilər. Digər xəstəlikləri istisna etmək və orqanların vəziyyətini izləmək vacibdir. Təzyiq 160-dan yuxarı qalxarsa, tibbi müdaxilə lazımdır.

Bəs dərman olmadan qan təzyiqini necə idarə etmək olar?

Arıqlamaq və düzgün qidalanma

Artıq çəki nə qədər çox olarsa, yüksək təzyiq ehtimalı da bir o qədər yüksək olar. Bədən çəkisindəki hər kiloqram itki qan təzyiqini 5 mmHg azalda bilər.

Mütəxəssis bildirib ki, duz hipertonik xəstələrin əsas düşmənidir və onun istehlakı minimuma endirilməlidir. Daha az duz, daha az konservləşdirilmiş yemək, kolbasa və duz əlavə edilmiş çörəkdən uzaq durmaq məsləhətdir.

Fiziki fəaliyyət

Bu, hipertoniya müalicəsinin vacib hissəsidir. Açıq havada gəzmək, üzgüçülük və digər orta fiziki fəaliyyət növləri qan təzyiqini aşağı salmağa kömək edə bilər. Həkimlər gündə ən azı 10 min addım atmağı məsləhət görürlər ki, bu da təzyiqi azaltmağa kömək edir.

Təzyiqin nəzarətdə saxlanılması

Xüsusi cihazdan istifadə edərək gün ərzində təzyiqin dəyişməsini izləmək çox vacibdir. Bu, həkiminizə qan təzyiqinizin nə vaxt və nə üçün artdığını daha dəqiq müəyyən etməyə və müalicənizi vaxtında tənzimləməyə imkan verəcəkdir.

Bütün səylərdən sonra təzyiq azalmazsa və yüksəlməyə davam edərsə, həkim dərmanlar təyin edə bilər. Ancaq başa düşmək lazımdır ki, pəhrizi qorumasanız, məşq etməsəniz və çəkiyə nəzarət etməsəniz, dərmanlar problemi həll etməyəcək.

Nubar Süleymanova, “İki sahil”