Aprelin 24-ü saat 8 radələrində Lerik rayonu Zenoni kəndi ərazisində “Ford Transit” markalı yük avtomobil əks hərəkət zolağına çıxaraq 90 metr dərinlikdə dərəyə aşıb. Nəticədə xəsarət alan 67 yaşlı sürücü Elman Qasımov, eləcə də sərnişinlər - 59 yaşlı Zakirə Bəşirova və 68 yaşlı Rəsmiyyə Qasımova xəstəxanaya çatdırılıblar. Lakin R.Qasımovanın həyatını xilas etmək mümkün olmayıb.

Bu barədə "İki sahil"ə Baş Dövlət Yol Polisi İdarəsindən (BDYPİ) məlumat verilib.

İlkin ehtimala görə, hadisənin baş verməsinə səbəb dağlıq relyefə malik yolda sürət həddinin yol şəraitinə uyğun seçilməməsi və kəskin manevretmə göstərilir.

Baş Dövlət Yol Polisi İdarəsi son vaxtlar dağlıq zonalarda analoji hadisələrə tez-tez rast gəlindiyini təəssüflə qeyd edir, bununla yanaşı, sərt döngəli, enişli-yoxuşlu yollarda idarəetmə təcrübəsinin mühüm əhəmiyyət daşıdığını bir daha sürücülərin diqqətinə çatdırır, onları dağlıq ərazilərə səfərlər zamanı daha diqqətli olmağa, meteoroloji şəraiti, avtomobillərinin texniki xarakteristikasının keçəcəyi ərazinin relyefinə uyğun olub-olmamasını nəzərə almağa çağırır.