Avropa İttifaqının (Aİ) 2028-2034-cü illər üçün gələcək Çoxillik maliyyə inkişafı proqramına Ukraynaya 88 milyard avro məbləğində yardım daxil edilə bilər.

“İki sahil” xəbər verir ki, bu barədə “Politico” nəşri sənəd layihəsinə istinadən məlumat yayıb.

Bundan əlavə, "Qlobal Avropa" yardım proqramına 190 milyard avro, Avropa Rəqabətlilik Fondunun proqramına isə 522 milyard avro məbləğində vəsaitin ayrılması planlaşdırılır.

Qeyd olunub ki, yeni büdcə "daha çevik" olacaq, bu isə Aİ-nin böhranlara daha tez reaksiya verməsinə imkan yaradacaq.

Bundan başqa, Avropa Komissiyasının (AK) sədri Ursula fon der Lyayen Avropa Komissiyasının gəlirlərinin artırılması üçün yeni tədbirlər təklif etmək niyyətindədir. Qəzetin məlumatına görə, xüsusilə, tütün məmulatlarına və dövriyyəsi 50 milyon avrodan çox olan şirkətlərə əlavə vergilər tətbiq ediləcək.