Macarıstanın xarici işlər naziri Peter Siyarto bildirib ki, Aİ və Ukrayna Macarıstanda hakimiyyət dəyişikliyinə can atır və müxalifəti dəstəkləyir. 

“İki sahil” xəbər verir ki, o, bunu YouTube-da “Döyüşçülər saatı” proqramında çıxışı zamanı Rusiya Xarici Kəşfiyyat Xidmətinin mətbuat bürosunun Brüssel və Kiyevin baş nazir Viktor Orbanı hakimiyyətdən uzaqlaşdırmağa çalışması ilə bağlı xəbərini şərh edərkən deyib.

“Bu gün Ukraynanın xarici siyasətinin ən mühüm istiqamətlərindən biri Tisa partiyasının gələn il Macarıstanda keçiriləcək parlament seçkilərində qələbəsidir”, - deyə, nazir bildirib.

Nazir həmçinin qeyd edib ki, Kiyev Viktor Orbanın Macarıstanın baş naziri postunda qalmaması üçün səylər göstərir.

O, həmçinin əlavə edib ki, Aİ liderləri Macarıstanın öz maraqlarına və məqsədlərinə cavab verən hökumətə malik olmasını istəyirlər.