Ukrayna Hökuməti və Fransa Respublikası Hökuməti arasında ikitərəfli əməkdaşlığın bir hissəsi olaraq, "Ukrzaliznitsa" ASC 150 kilometr dəmir yolunun yenilənməsi üçün 19 min ton dəmir yolu relsləri alacaq.

“İki sahil” xəbər verir ki, bu barədə Ukrayna İcmalar və Ərazilərin İnkişafı Nazirliyi məlumat yayıb.

Bildirilib ki, Ukraynanın bərpası ilə bağlı birgə layihələri Fransa Respublikası Prezidentinin Ukraynaya yardım və yenidənqurma üzrə xüsusi nümayəndəsi Pyer Heilbronn və Ukrayna baş nazirinin bərpa işləri üzrə müavini – icmaların və ərazilərin inkişafı naziri Oleksiy Kuleba müzakirə ediblər. Xüsusilə, tərəflər dəmir yolu infrastrukturunun inkişafı, hava nəqliyyatı sahəsində əməkdaşlıq, Çerniqov vilayətində aparılan yenidənqurma işləri və s. müzakirə ediblər.

“İlkin razılaşmaya əsasən, Fransa tərəfi 19 min ton dəmir yolu relsləri tədarük edəcək. Bu, 150 ​​kilometr relslərin yenilənməsinə imkan verəcək. İlk göndəriş 2025-ci ilin yanvarına planlaşdırılıb”, - deyə qeyd edilib.

Məhərrəm Ağalaroğlu, “İki sahil”