"Zirə"nin futbolçusu Salifu Suma Kiyev "Dinamo"suna keçməyəcək.
“İki sahil” xəbər verir ki, bu barədə ukraynalı şərhçi və jurnalist Mixail Spivakovski məlumat yayıb.
O, bildirib ki, "Dinamo" və LNZ klubları Salifu ilə maraqlansalar da, transfer məbləğinin yüksəkliyi səbəbindən keçid gerçəkləşməyəcək:
"Doğrudan da "Dinamo"və LNZ klubları Salifu Suma ilə maraqlanırdılar. Suma 3 gün əvvəl sözün əsl mənasında əvvəl “Qarabağ”a qarşı yüksək səviyyəli oyun keçirdi. Həmin görüşdə Aleksey Kaşuk “Qarabağ” üçün, Suma isə “Zirə” üçün 2 qol vurub. Sumanın komandası bu oyunda 3:2 hesabı ilə qalib gəlib. Salifu həm cinah oyunçusu, həm də mərkəz hücumçu mövqeyindən yaxşı qollar vurdu.
Əsl problem odur ki, “Zirə” futbolçu üçün 1 milyon avro istəyirdi. Məbləğ kifayət qədər böyükdür. Bunlar hər iki klub - həm "Dinamo", həm də LNZ üçün eyni şərtlərdir.
"Dinamo" və LNZ futbolçunun profilini öyrəniblər. Onun statistikası əladır. İndi Suma “Zirə” ilə müqaviləsini uzadıb. Düşünürəm ki, artıq "Zirə" transfer üçün 1,5 milyon civarında pul istəyəcək. Ona görə də biz Sumi ilə vidalaşa bilərik”.
Qeyd edək ki, daha əvvəl "Zirə"nin baş məşqçisi Rəşad Sadıqov öz açıqlamasında S.Suma üçün təkliflər gəldiyini bildirmişdi. Lakin o, həmin klubların adını açıqlamamışdı. Mətbuatda isə "Dinamo"nun onunla yaxından maraqlandığı yazılmışdı.
Qvineyalı sağ vinger olan 21 yaşlı futbolçu "Zirə"yə 2023-cü ildə keçib. Onun klubla müqaviləsi 2027-ci ilin iyununda başa çatır.
