Ümid İlqar oğlu Qasımzadə İkinci Qarabağ müharibəsində Vətənin yaşaması naminə sinəsini ona sipər edəndə ömrünün 19-cu ilini yaşayırdı. Cəlilabad rayonu, Göytəpə şəhərində dünyaya göz açan Ümid yaşının bu az ilində yazdığı şanlı tarix ilə bütöv bir xalqın qəhrəmanlıq simvoluna çevrilərək milyonların ürəyinə köçübdür. Dövlət tərəfindən də odlu-alovlu müharibədə göstərdiyi fədakarlığa, mərdliyə yüksək qiymət verilib. Ölümündən sonra “Döyüşdə fərqlənməyə görə”, “Vətən uğrunda”, “Füzulinin azad olunmasına görə” medallarla təltif edilib.
Qarabağımızın xilaskar oğlu Ümid özünü dərk edəndən doğma Azərbaycana, dövlətinə və xalqına ürəkdən bağlanıb. Səmimiyyəti, yüksək əxlaqı, insanpərvərliyi onun Vətənə layiqli övlad olmasından xəbər verib. 2020-ci ildə Azərbaycanın Milli Qəhrəmanı Vüqar Mürsəlov adına Göytəpə şəhər 1saylı tam orta məktəbi bitirəndə, eləcə cəmiyyətdə yaxşı idmançı kimi də ad qoymuşdu. Belə ki, o, məktəbdə oxuduğu zaman idmanın ağır atletika növünə maraq göstərib, Cəlilabad rayon Gənclər və İdman İdarəsinin nəzdində fəaliyyət göstərən UGİM-də məşq edib. Cəlilabadlı atletin uğurlarına gəldikdə isə müxtəlif vaxtlarda Respublika və beynəlxalq səviyyəli yarışların iştirakçısı və mükafatçısı olub. Belə ki, gənclər arasında Azərbaycan çempionatında 2019 və 2020-ci illərdə gümüş medallarla pərəstişkarlarını sevindirib.
Bir qayda olaraq haqsızlığa, ədalətsizliyə qarşı olan Ümid erməni dığaların Qarabağımızın işğalına heç cür döz bilməyib. Elə ordu sıralarına da düşməndən qisas almaq məqsədilə gedib. Xidmət zamanı fəallığı, nizam-intizam ilə seçilib. Təmiz ürəkli, vicdanlı, qeyrətli gənc komandirlərin verdiyi tapşırıqları vaxtında, dəqiq yerinə yetirib, Vətənini göz-bəbəyi kimi qorumaqla uğrunda canını, qanını belə fəda etməyə hər an hazır olub.
Ümid Qasımzadə həqiqi hərbi xidmətdə olanda Vətən müharibəsi başlanıb. İgid əsgər ilk gündən ölüm-dirim savaşına qatılıb. Vətən, torpaq sevgisindən güc alan Ümid döyüşdən –döyüşə dığalara ciddi itkilər verib. Həm də mərdliyi, qəhrəmanlığı onunla çiyin-çiyinə döyüşən əsgərlərdə qələbəyə inam yaradıb. Oktyabrın 13-də Füzulinin azadlığı uğrunda tarix yazan Ümid özü də qəfil atılan yağı gülləsinə tuş gəlib. Son nəfəsdə də “Vətən” deyib şəhadətə qovuşub.
Bəli, Azərbaycan və dünya hərb tarixinə qızıl hərflərlə yazılan 44 gülük haqq savaşımızda Ümid kimi igidlərin qanı bahasına Qarabağımız 30 ildən sonra azad olundu, mənliyimiz və kimliyimiz bütün millətlərə bilindi...
Zəfər Orucoğlu,
Azərbaycan Jurnalistlər Birliyinin üzvü
